CAGAYAN DE ORO – Naghangyo si Misamis Oriental Governor Bambi Emano ngadto sa Inter Agency Task Force o IATF sa pagpailawom sa Misamis Oriental apil ang syudad sa Cagayan de Oro sa Enhanced Community Quarantinee tapos nasayran nga aduna nay local transmission ang syudad sa coronavirus disease. Matud pa ni Emano nagsulat siya sa maong hangyo kang President Rodrigo Duterte pinaagi sa IATF. Gitin-aw ni Gob. Emano nga ilang giapil sa ilang request ang Cagayan de Oro tungod kay mao kini ang sentro sa probinsya.
Gisugilon usab sa maong gobernador nga mipili sila sa paghimo sa sulat-hangyo aron masunod ang national guidelines. Gipasabot sa maong opisyal nga dili pamolitiko ang maong lakang kon dili pagprotohir lamang sa katawhan sa probinsya sanglit namatikdan nga kompyansa ra ang kasilinganang dapit.
Nasayran nga gipaandam na ni Emano ang Provincial Task Force against Covid-19 sa higayon nga maaprobahan na sa IATF ang ilang sulat-hangyo.