Nagyaman ni Gob. Matthew Marcos Manotoc kadagiti amin a makipartisipar iti mannariamaan nga Skills Training on Meat Processing.
Inlawlawagna a napigsa ti probinsia iti benneg ti produksion ngem kurang iti panagiproseso ken iti ‘’post production’’.
Imbatadna a daytoy ti pakaragsakanna gapu ti panagtitimpiyog ti gobierno probinsial babaen iti Micro Small and Medium Enterprises Office, Department of Science and Technology, Mariano Marcos State University ken dagiti speakers iti nasao a training para iti pannakaisuro dagiti gunglo dagiti babbai ditoy probinsia.
Segun iti gobernador, daytoy ti kasapulan ti probinsia ti pannakaipatungpal ti ‘’value adding’’ kadagiti bukod a produkto.
Impadanonna ti panangnamnamana a magun-od ti pannakapagbalin dagiti ‘’finished product’’ a world class.
Inbunannagna a daytoy ti ar-arapaapenna a pagbalinan dagiti kabukbukudan a partuat dagiti kakailian.
Ginutigot ni Mrs. Elma Gabriel, ti mangidadaulo to MSME Office a mangitultuloy iti nasao a tignay agsipud ta adu ti produksion ti Ilocos Norte nangnangruna iti benneg ti agrikultura.
Innayunna a maitultuloy ti pannakaipangpangruna ti processing ken ti panagtulong kadagiti interesado iti negosio nga adda pakainaigan dagiti makmakan. (Ronald Domingo, RPN DZRL Batac Correspondent)
(Source: Provincial Government of Ilocos Norte)