Epektibo na karong Domingo, May 16, ang subling pagpatuman sa “stay at home on Sunday” policy sa General Santos City government, taliwala sa padayong bahad sa coronavirus disease 2019 infection.
Sa pakighinabi sa RPN DXDX RADYO RONDA GENSAN, subling giawhag ni City Mayor Ronnel Rivera nga mga residente nga magpuyo sa panimalay kung wala’y importanteng lakaw o katuyuan, aron makalikay sa bahad sa Covid-19.
Una nang gipahimangnuan sa city government ang mga business establishments, sama sa mga grocery stores, malls ug ang public market nga sarado una og usa ka adlaw, aron malimitahan ang paggawas sa tao.
Gibawal usab ang pagsulod sa GenSan sa mga non-residents o ang mga maggikan sa laing mga silingang-lugar.
Hinuon, nakapatik nga exempted sa bagong Executive Order No. 22 ni Rivera ang mga frontliners, essential workers, miyembro sa government security forces, mga pari/pastor/imams ug ang mga residente nga buot moadto sa mga simbahan.
Una nang gipasabot sa city government nga tumong sa maong katuyuan aron malikay ang publiko sa bahad sa Covid-19. (John Rey Somido)