General Santos: Zero fatality gipasalamatan sa Maitum, Sarangani province

0
165

Taliwala sa dakong damyos nga nasinatian human sa makusog nga bugwak sa tubig-baha ug pagdahili sa yuta, mapasalamaton na lamang ngadto sa Ginoo ang mga opisyales ug katawhan nga walay natala nga nakabsan sa kinabuhi sa tao sa mga kabarangayan sa Maitum, Sarangani Province.

Visit RPN DXDX General Santos

Maitum, Alabel ug Kiamba ang may pagbaha atong Martes, Marso 8, apan ang hilabihang naigo mao ang lungsod sa Maitum.

Sa situation report ni Disaster Officer Raymond Mayled, labaw sa Municipal Disaster Risk Reduction and Management Office kon MDRRMO Maitum nga na-sabmit sa buhatan ni Mr. Rene Punzalan, nangulo sa PDRRMO Sarangani, anaa matud pa sa 288 ka panimalay ug 923 ka mga indibidwal ang na-apektuhan as of March 9.

Padayon pang ginakolekta ang final data ug kinatibuk-ang damage kung diin adunay mga tulay ang nadaot.

Sa initial nga pag-estimate, dili muubos P130 Milyones ka pesos ang damyos sa imprastraktura, wala pay apil ang sa agrikultura. Hinuon wala nadamay ang suplay sa kuryente ug linya sa komunikasyon. Hinanaling nakapadangat og relief goods ang Sulong Kaligtasan program ni Governor Steve Chiongbian Solon ug Ronda Probinsya program ni Congressman Ruel Pacquiao, sa pagsuporta ni Senador Manny Pacquiao.

Libuan ka litros sa krudo ang gihatag gikan sa Kapitolyo sa Sarangani aron magamit ang maong krudo sa mga heavy equipment sa clearing operation ug adunay maagian dayon ang mga residente.  Nagtinabangay sa actual rescue operation atong Martes ang mga LGU rescuer gikan sa Maitum, Kiamba ug Maasim. Anaa usab bayanihan ang Bureau of Fire, PNP Maitum, Kabalikat CiviCom, MSWDO-MHO, bisan na ang pribadong sektor ug NGOs sama sa Charitable Maitum, ug uban pang mga community volunteer.

Naka-deklara na ang Sangguniang Bayan og state of calamity sa pagpanguna ni Vice Mayor Tito Balazon kauban ang mga municipal kagawad sila Councilor Arnold Abequibel, sa direktiba ni Mayor Bryan Reganit aron paspas magamit ang disaster fund.  Nakigsabot napud ang Sarangani Provincial Government sa pamunuan ni Governor Solon alang sa long-term nga matabang sa probinsya subay sa buhaton nga recovery plan sa munisipyo.

Anaa sa emergency MDRRMC meeting nga gipatawag ni Mayor Reganit kauban ang mga barangay kapitanes sila Vice Governor Elmer De Peralta, Assistant Provincial Administrator Engr. Gerald Faciol, PSWDO Head Raquel Panal, ug mga board member sa MaKiMa.

Ora-orada ni-responde aron makapadangat sa ilang hinabang ug pag-ampo sulod sa Maitum evacuation center ug mga barangay sila Board Member Jess Bascuña ug Board Member Rosemarie “Balot” Martinez-Sayo, sa pagsuporta nila Board Member Odoy Jamora ug Board Member Jong Falgui sa SP committee on disaster.

Gihan-ay na sa LGU Sarangani ang koordinasyon tali sa DSWD Region 12 ug National Housing Authority para sa dungag relief goods ug ayuda nga pabalay sa mga naanod nga pinuy-anan anaa sa kwarenta (40) kabuok totally damaged.  Usa ka LPA kon low pressure area ang nagpaulan sa maong mga adlaw sa isla sa Mindanao.

Gibutyag ni Punzalan nga padayong mag-binantayon sa mga pag-ulan ug landslide gumikan wala pa gideklara sa PAG-ASA nga summer season na ning panahuna.Nanawagan ang LGU Maitum sa buot mupadangat pa sa ilang mga donasyon nga kontakon lang ang MDRRMO ug MSWDO Maitum sa mga numero 09504066946 ug 09399364603.

(Source: LGU Maitum)

Leave a Reply