General Santos City – Walay bomba nga nibuto sa bulaong terminal, kini giklaro ni Police Col. Jomar Alexis Yap, Acting City Director sa General Santos City Police Office nga sukwahe sa mga nanggawas sa social media.
Pamahayag niya nga ang pagbuto nga nahitabo sa bulaong terminal ang resulta sa gihimong disruption sa EOD team aron masayran kung unsa ang sulod sa maong unattended baggage ug kini ang parte sa ilahang standard operation procedure.
Nauna na usab nila nga gi-turnover ngadto sa Regional Forensic Unit ang mga narekober sa maong unattended baggage aron masuta kung IED ba o dili.
Dugang pamahayag ni Police Col. Yap nga ilaha pang ginahulat ang resulta sa imbestigasyon sa Forensic Unit aron makumpirma kung unsa nga matang sa powder ang nakuha sa maong butang.
Nauna na usab nila nga gi-request ang kopya sa cctv sa maong bus, sa karon ilaha nalang ginahulat nga mahatag kanila ang kopya aron masayran kung si kinsa ang posibleng tag-iya sa maong unattended baggage.
Saysay niya nga dakong tabang ang mga cctv sa bus o sa bisan unsang matang sa sakyanan aron masayran ang mga pasahero nga naga-saka panaug.
Kalabot niini, gibutyag ni Col. Yap nga nahimo na nga mabinantayon ang katawhan ug paspas na nga nagahatag ug report hilabina sa mga insidente sa unattended baggage.
Saysay niya dako ang nahimong tabang sa mga ginahimo nga simulation exercise sa kapulisan ug militar ug kini nahimong epektibo gumikan paspas ang pagrespondi nga gihimo sa mga concerned agency bisan na ang katawhan mismo.
Pagpaklaro niya nga walay pagpamomba sa GenSan kundili usa ka standard operation procedure ang gihimo rason nga adunay pagbusikad nga nahitabo.
(Source: General Santos City Police Office)