Tupi, South Cotabato – Himas rehas karon sa silda sa kapulisan ang usa ka lalaki human nga nakuhaan ug mukabat sa P102,000 nga kantidad sa gituohang illegal drugs atol sa gihimong buy-bust operation sa Police Regional Office-12 sa pakig-alayon sa PDEA-12 sa Sitio Tucalabong, Purok 6, Barangay Crossing Rubber, Tupi, South Cotabato niadtong adlaw nga Sabado, Marso 4, 2023.
Giila ni Police Brigadier General Jimili Macaraeg, Regional Director sa Police Regional Office 12, ang drug suspek nga si alyas “Nas”, 31 anyos, minyo ug residente sa Poblacion, Datu Piang, Maguindanao. Segun ni PBGen Macaraeg, alas 5:40 sa hapon dihang nasikop si alyas Nas sa hiniusang pwersa sa Regional Police Drug Enforce Unit 12 (lead unit); Regional Special Operations Group (RSOG) 12; Regional Intelligence Division (RID) 12- Tracker Team Charlie; RIU12; Philippine National Police-Drug Enforcement Group SOU12; Tupi MPS; South Cotabato Police Provincial Office; ug sa pakig-alayon sa PDEA12, Koronadal City, South Cotabato.
Nakumpiska sa suspek ang upat ka sachet sa gituohang shabu nga may timbang nga 15 gramos ug may Standard Drug Price (SDP) nga P102,000 ug usa ka P500 bill isip buy-bust money.
Kasong kalapasan sa RA 9165 o Comprehensive Dangerous Drugs Act of 2002 ang atubangon nga kaso sa maong suspek.
Gipaniguro usab ni PBGen Macaraeg nga padayon ang pagpakusog sa mga kampanya kontra ilegal nga droga
aron nga mapabilin nga luwas ug malinawon ang SOCCSKSARGEN Region.(Fred Degala)