Gusto nako nga masulbad na ang reklamo sa pipila ka pamilya dinha sa Barangay Consolacion.
Mao kini ang pamahayag ni Konsehal John Michael Seno, atol sa milabayng tigom sa komite sa public works, human gituki ang sulat ni Engr. Gil Iturralde, project manager sa FRIMP-CDOR sa Deparment of Public Works and Highways-10, mahitungod sa reklamo sa pipila ka mga pamilya nga nanimuyo diha sa Barangay Consolacion nga maapektohan sa pagtukod sa Megadike Project.
Sa tigom sa komite, usa sa mga molopyo sa dapit ang mireklamo nga unta mabayran og P500 mil alang sa iyang panimalay nga maigo sa proyekto tungod kay matod pa dako na siya og nagasto sa pagtukod niini samtang adunay pipila sa mga maapektohan nga interesadong mahatagan sa relokasyon.
Gipasabot ni Seno nga dili gayud mabayran parehas sa kwentada sa mga direkta nga naapektohan, hinoon iyang gipasalig nga tabangan silang maindorsar ngadto sa City Housing and Urban Development Department (CHUDD) nga mahatagan og relokasyon.
Gibutyag usab sa konsehal nga ang proyekto hapit na itunol sa DPWH pabor sa syudad ug sa dili pa kini dawaton dili na gayud papuy-an ang dapit aron malikay alang sa kapaseguroan sa katawhan.
(Source: CdeO City Council)
