NAHARANG ug nakompiska sa hini-usang pwersa sa kapulisan ang P9.2 milyong kantidad sa smuggled o palusot nga sigarilyo sa Purok 3, Barangay Katubao, Kiamba, Sarangani Province bag-ohay pa lamang.
Naharang ug nakompiska kini sa gimuntar nga COMELEC CHECKPOINT sa Kiamba-Maasim national highway sa nasampit nga Probinsiya sa mga tauhan sa 3rd Mobile Platoon, 2nd Sarangani Provincial Mobile Force Company, ilalum sa superbisyon ni PLTCOL BENJIEL KIRBY L BAJO, Force Commander, ubos sa koordinasyon sa Kiamba Municipal Police Station ug Bureau of Customs (BOC)- Gensan.
Una niini, gipara sa kapulisan sa naasoy nga Checkpoint ang usa ka kolor maroon nga 10-wheeler Dumptruck Plate No. WQV-392 ug sa gihimong plain view inspection, mitambad sa mga mata sa kapulisan ang daghang karton sa kahon sa mga sigarilyo nga maoy kargamento sa nasampit nga Dumptruck nga gimaneho ni alyas “Ray”, legal age, minyo, residente sa Purok Isaac Abalayan, San Jose, Davao Del Sur.
Pero, maoy napakyas sa pagpresentar sa bisan unsang dokumentasyon saa karga niining bulto-bulto nga sigarilyo nga miresulta sa pagdakop ngadto kaniya ug iyang pagkabilanggo sa dili awtorisado nga transportasyon naasoy nga mga kargamento.
Kini gilangkoban sa 90 boxes sa King cigarettes ug 82 boxes sa New Berlin cigarettes nga adunay gibana-bana nga kantidad sa P9, 236,400.00.
Ang mga nasakmit nga butang gimarkahan ug gi-imbentaryo sa mismong lugar diin kini naharang nga adunay presensya sa usa ka opisyal sa Barangay.
Samtang, dinakpan nga driver sa maong Dumptruck gipahibalo sa iyang mga katungod sa konstitusyon sa usa ka pinulongan nga iyang nasabtan.
Ang nasampit nga driver ug ang nakumpiskang palusoy nga mga sigarilyo anaa karon sa kustodiya sa Kiamba Municipal Police Station alang sa tukmang dokumentasyon ug legal nga proseso.