General Santos City – Mikabat matud pa sa kinatibuk-ang 1,700 ka security forces apil ang mga boluntaryong force multifliers ang gipakatag sa dakbayan sa Gensan aron sa pagbantay sa lain-laing mga aktibidad nunot sa kasa-ulogan sa 2025 KALILANGAN FESTIVAL nga adunay P15 milyones nga budget o pundo.
Kana ang gikabutyag ngadto sa mga sakop sa Media ni Gensan City Police Director, COL. NICOMEDES OLAIVAR JR.
Gi-abli ang aktibidad sa nasampit nga kapiestahan niadtong adlaw’ng Sabado, Pebrero 21, 2025 ug motak-op kini sa Pebrero 27, 2025 isip ika-86 ka tuig sa kasumaran sa kamugnaan sa Gensan human kini nahimong s’yudad.
Butyag sa maong opisyal ang pwersa sa seguridad ipakatag gikan sa General Santos City Airport, nga maoy tugpahanan sa mga dagkung personahe nga mga bisita sa Kalilangan Festival gikan sa ka-ulohang Manila hangtud sa mga lugar sa sentrong bahin sa dakbayan, diin ipahigayon ang nasampit nga aktibidad.
Sa kinatibuk-ang ihap sa security forces, mokabat lamang matud pa sa 745 mga sakop sa kapulisan, diin ang ubang galangkob sa security forces gagikan sa Joint Task Force (JTF) Gensan, ug civilian civic organizations.
Sigun ni Col. Olaivar, ang ubang mga sakop sa Gensan PNP ibilin sa 10 ka mga Police Stations sa Gensan nga maoy motutok sa lain-laing regular nga mga gimbuhaton sa kapulisan matag-PNP Stations.
Pipila sa mga dagkung bisita sa Kalilangan Festival mao ang pipila ka mga sikat nga performing artist sama sa Kamikaze ug Rico Blanco, ingon man pipila ka mga sakop sa Senado ug Executive Departments.
(Rem Agdon)
News&Photos: LGU-Gensan