General Santos City – Patong-Patong nga kaso ang posibleng atubangon sa Police nga si Police Cpl. Gecar Paras, nga nakabase sa Mobile Police Unit (MPU) ilawom sa GenSan City Police Office kansa gialigarang nagpabuto ug pusil atubangan sa usa ka tindahan sa Barangay Lagao, Gensan higayon nga kini mapamatud-ang nagpabuto gyud ug pusil.
Nasayran nga una nang gitugyan sa GenSan City Police Office ngadto sa Police Station 3 ang pagpasang-at ug kasong kriminal batok kang Police Cpl. Gecar Paras, human kining gireklamo uban sa iyang duha pa ka kaubanan.
Sumala kang Police Lt. Col. Aldrin Gonzales, tigpamaba sa Gensan City Police Office nga gawas sa kasong kriminal mag-atubang usab ang maong police ug kasong administratibo kung asa gitugyan na usab kini sa City Internal Affairs Services.
Dugang pamahayag ni Police Lt. Col. Gonzales nga gi-disarmahan na si Police Cpl. Paras ug kasamtangang naka-restricted custody sa Mobile Police Unit.
Padayon pa usab nga gipangita ang duha niini ka mga kaubanan. Nasayran nga subay sa impormasyon, mupalit unta ug beer sa tindahan ang mga nahisgutan apan kalit lang matud pang nagpabuto ug pusil sa walay igong rason. (John Rey Somido)