General Santos City—Aminado si City Councilor Jose Edmar Yumang nga dako gyud ang problema sa transportasyon sa dakbayan hilabina nga halos matag bulan, naga-daghan nga naga-daghan ang ihap sa mga driver ug operator sa tricycle kung asa kini ang pinakasayon ug dali nga matang sa panginabuhian.
Saysay niini nga dakong tabang para sa syudad ang naunang transportation code nga na-aprubahan sa hawanan sa konseho kung asa upat ka cluster ang mga tricycle. Gani si City Councilor Dominador Lagare Jr, maoy chairman sa komitiba sa transportasyon dihang kini gi-aprubahan.
Ilalom sa maong transportation code, kung asa nalakip ang mga tricycle sa maong mga lugar lang usab sila pwedeng mamasahero.
Dugang pamahayag niini nga sa karon, gihimong kooperatiba ni Kagawad Lagare ang mga tricycle ug inay nga upat ka cluster tulo nalang ka mga kooperatiba nga mao ang red, white ug apple green.
Saysay ni kagawad yumang nga subay sa transportation code sa dakbayan, wala nabutang nga kinahanglang pugson ang mga operator nga mu-apil sa usa ka kooperatiba aron mahatagan ug prangkisa.
Kini matud pa ang makonsiderang pagsupak sa konstitusyon gumikan walay katungod ang gobyerno nga mamugos hilabina kung kini supak sa personal nga tinuohan sa usa ka indibidwal.
Kalabot niini, gibutyag ni Kagawad Yumang nga kinahanglang i-abli para sa tanan ang prangkisa ug dili ipa-agi sa kooperatiba gumikman dili malikayan nga adunay mahitabong kurapsyon ug dako ang posibilidad nga pilion lang ang mahatagan sa prangkisa.
Pagpaklaro niini nga ang pag-angkon ug prangkisa ang makonsiderang prebilihiyo sa tanan ug dili angayan nga i-agi ug pugsanay. (Alfredo Madas Jr.)