General Santos City: Duha ka tawo ang namatay sa managlahing insidente sa pagpamusil sa General Santos City niadtong Lunes. Ang General Santos City Police Office nagkanayon nga ang unang insidente nahitabo mga alas 5:30 sa hapon, diin usa ka 39-anyos nga babaye ang gipusil-patay sa gawas sa iyang panimalay sa Barangay Fatima. Sumala sa mga naksaksi, ang biktima gipusil-patay sa mga suspek nga nagmotorsiklo. Laing pagpamusil ang nahitabo sa Barangay Dadiangas West pasado alas 6:40 sa gabii sa susamang adlawa. Ang biktima giila nga 29-anyos nga residente sa Purok Sta. Cruz, Silway. Niadtong Sabado, si retired State Auditor Manuel “Maning” Malinao gipusil usab sa wala pa mailhing mga suspek sa iyang panimalay sa Sta. Cruz, Barangay Dadiangas West, mga alas-7:00 sa buntag. Ug kagahapon, lain nasab ang gipusil-patay sa dakbayan sa Gensan sa wala ma-ilhing mga mamumuno. Tungod niini, nanawagan ang pipila ka mga residente ngadto kang General Santos City Mayor Lorelie Pacquiao tungod sa giingong kapakyasan sa iyang administrasyon sa pagsulbad sa nagkadaghang insidente sa pagpamusil-patay ning s’yudad nga bisan mga babaye, patyon. (REM C. AGDON)