Polomolok, South Cotabato – Patay ang usa ka biktimang si Louie Manansala, 40 anyos, negosyante, nga taga Tupi, South Cotabato human kining gipusil sa wala pa mailhing suspetsado, alas 9:45 sa gabie, sa bahin sa Crossing Palkan, Polomolok, South Cotabato.
Nasayran nga naglawig ang nasampit sa National Highway sa lungsod, sakay sa iyang center car o mas naila sa tawag nga bao-bao nga sakyanan padulong sa direksyon pa Gensan, diin kasamtangan pa kining nagalive sa iyang Facebook niadtong higayuna.
Kalit lang dunay nadunggan nga sunod-sunod nga buto sa pusil nga gisundan sa pagkatumba sa biktima ug pagkawala sa iyang FB live.
Paspas usab nga girespondihan sa tropa sa Polomolok Municipal Police Station ang insidente human nadawat ang report kung asa subay sa ilang inisyal nga imbistigasyon, ang suspek sa krimen ang nakamotorsiklo kansa paspas nga misibat sa wala masayring lugar human sa pagpamusil.
Narecover sa kapulisan sa crime scene ang 4 ka fired cartridge sa cal. 45 pistol ingon man ang kwarta ug uban pang mga gamit sa biktima sa iyang sakyanan . Sa karon, nagpadayon pa ang ginahimong imbistigasyon sa kapulisan kalabutan sa maong insidente. (Rey Ombana)