General Santos City – Midangop sa buhatan sa Police Station 2 (Makar PNP) ang usa ka Jason Barcelona, residente sa Purok San Roque, Barangay Labangal, GenSan alas 8:00 ang takna sa gabie human matud pa nawagtang ang iyang motorsiklo nga Honda 125 kolor blue kansa iya lang gibilin sulod mismo sa compound sa balay nga iyang girentahan sa maong lugar.
Matud ni Jason, wala niya gi-lock ang iyang motor tungod siya kumpyansa nga anaa lang sulod sa compound sa girentahan niining balay niya gibutang ang iyang motorsiklo.
Atol sa pagsumbong sa biktima sa kapulisan, duna na daan kini gidudahan nga personahe nga posibleng mikuha sa iyang motorsiklo.
Tungod sa impormasyon nga gihatag sa biktima, malampusong narecover ang motorsiklo niini sa usa ka
John Paul Buenaflor, residente sa maong lugar, kanhing priso tungod sa kasong carnapping.
Malampuson usab nga nadakpan ang suspek human nga didto mismo nakuha sa iyang posisyon ang motor sa biktima, samtang wala usab nasikop ang kaubanan niini nga usa matud pa ka 20 anyos.
Sa karon ang suspetsado anaa na sa kustudiya sa Police Station 2, ug gi-andam na ang kaso nga possible niining atubangon. Samtang posible usab nga apil makasuhan ang kaubanan niining nakasibat. (John Rey Somido)