General Santos City – Magdawat na ang lokal nga gobyerno sa dakbayan og aplikasyon sa prangkisa sa tricycle. Mga dili residente sa Syudad kusganong gibawal sa pagpamasada sulod sa GenSan.
Matud pa ni Kag. Jun Lagare, Chairperson sa Committee on Transportation nga ilang sutaon ang tanang mga aplikante kung kwalipikado sa mga rekositos.
Iyang gihingusgan nga bawal gayud ang dili residente sa GenSan nga magkuha og prangkisa.
Gikadugang pa sa nasampit nga opisyal nga oras makapasa sa rekositos ilang ipasa sa Sangguniang Panlungsod alang sa aprobal.
Nasayran nga daghan ang wala nagrenew nga mga tricycle drivers sa ilang prangkisa tungod kay wala gipatuman sa hingpity ang mga balaod.
Gibutyag nga kapin lang sa 1,000 ka mga tricycle ang may prangkisa ning higayona.
Gibutyag nga daghan sa mga tricycle nga gabiyahe sa dakbayan ang gikan sa laing mga lugar.
Una niini gibutyag ni Kag. Lagare nga ang ideal nga gidaghanon sa mga tricycle sa dakbayan ang anaa sa 9,000 ka buok. (Fred Degala)