General Santos City–Nagpadayon ang gihimong imbestigasyon sa kapulisan kalabutan sa kamatayon sa biktimang si Raymond Toribio, taga Barangay Kipalbig,Tampakan,South Cotabato kinsa una ng nakit-ang patay daplin sa dalan sa Sitio Matagol sa nasangpit nga barangay alas 5:45 sa buntag sa milabay nga semana.
Matud pa ni PMsgt. Ian Placio tigpamaba sa Tampakan MPS nga una silang nakadawat ug tawag gikan sa mga laborer sa banana plantation nga nagpahibalo kalabutan sa nakit-ang patay hinungdan gilayon nilang girespondehan ang lugar.
Paghidangat sa area nakit-an sa kapulisan ang biktima nga naghigda daplin sa dalan nga wala nay kinabuhi nga dunay igo pinusilan sa ulo ug lawas.
Saysay pa ni Placio nga nadunggan sa nagpuyo sa lugar ang buto sa armas apan wala lamang niini gipanumbaling sa pagtuo nga normal lang hinungdan nga wala kini migawas sa panimalay gumikan ngitngit usab ang lugar.
Basi usab sa ilang imbestigasyon nasuta nga ang biktima ang dunay deperensiya sa panghuna-huna rason nga dili pa nila matumbok ang motibo nganong gipatay kini sa wala pa mailhing mga suspek.
Ilado matud pa ang biktima sa mga residente sa lugar gumikan kanunay nila kining makit-an nga magbaktas sa dalan ug duna ray higayon nga manguha kini ug mga senina sa sampayan nga iyaha rapod suoton.
Nagtuo usab si Placio nga basin natripan lamang ang biktima gumikan mismo ang pamilya niini ang blangko usab sa motibo sa krimen bisan duna kini mental disorder wala kini nakalaban sa ilang lugar.
Nasuta nga ang biktima ang naka-angkon ug tulo ka igo pinusilan usa sa ulo ug duha sa likod diin nakuha sa kapulisan sa crime scene ang tulo ka basiyu sa 9mm pistol.
Sa karun padayong nagapangalap ug impormasyon ang kapulisan sa posibleng mailhan ang responsableng mihimo sa krimen. (Alfredo Madas Jr.)
