Daw nasobrahan karon ni Gensan City Councilor Richard Atendido ang iyang katungdanan isip bag-ong napili nga Chairman sa Committee on Finance sa SP- Sangguniang Panlungsod human niini gi-indorso ang pagpabilin sa orihinal nga “2024 Proposed Annual Budget sa mga Department Heads og Division Offices sa City Hall nga tapos na untang natuki ug na-plastada sa kanhing Chairman sa Committee on Finance sa SP-Gensan.
Sigun ni Konsehal Yumang- ang kanhing labaw sa maong Komitiba, nga sa gihimong lakang ni Konsehal Atendido tataw kaayo kining nanghilabot sa gimbuhaton sa Ehekutibo sa dihang gipatawag sa iyang buhatan ang tanang departamento, CMO-Divisions ug bisan ang tanang hingtungdan nga ahensya sa nasudnong kagamhanan aron pagpahibalo kalabot sa pagpabilin sa ilang orihinal nga budget proposal.
Butyag ni Konsehal Yumang, usa ka foul-play ang gihimo ni Konsehal Atendido, tungod interbensiyon kana sa Executive Function.
Dugang isplikasyon pa ni Yumang nga ang komite mag-review lang ug mogamit sa gahom sa pitaka, pero para maghimo ug letter address sa mga departamento, nanghilabot siya sa sphere of the executive, diin gawas na gayud kini sa iyang functions, kana kung tinuod nga miduso og sulat si Konsehal Atendido. (Rey Ombana , photo courtesy of EdYumang | RCA)