General Santos City – Atong siguruhon nga ang atong mga opisyal nga adunay makita nga mga patik mosunod niini nga direktiba.
Importante kini sa pagmintinar sa disiplina sulod sa PNP ug pagpatunhay sa mga sumbanan sa atong dress code ug kinatibuk-ang panagway.
Kana ang gipahayag ni PBGEN GULMATICO-ang kasamtangang labaw sa Police Regional Office (PRO) Region12 nga naka-base sa Brgy. Tambler, General Santos City human gimando sa Philippine National Police (PNP) Headquarters ang pagtang-tang sa mga tattoo sa kapulisan nga dayag makita sa lain-laing parti sa kalawasan hangtud Oktubre 2024.
Gikabutyag, nga mao na lama’y gipaabot ang opisyal nga guidelines gikan sa Technical Working Group (TWG) kalabot sa proseso sa pagtangtang sa mga makitang tattoo sa mga police personnel. Kini nunot sa paglibkas sa moratorium sa pamunuan sa PNP human sa makuti nga pagrepaso sa polisiya.
Ang moratorium opisyal nga gilibkas ni PNP Chief, POLICE GENERAL ROMMEL FRANCISCO MARBIL, niadtong Hulyo. Gihatagan ang mga opisyal hangtod Oktubre 2024, aron makuha ang ilang makita nga mga patik o tattoo. Ang polisiya espesipikong nagpunting sa mga patik nga ekstremista, etniko o relihiyoso nga diskriminasyon, opensiba, malaw-ay, racist, sexist, o kung dili man gidili.
Bisan pa, ang mga aesthetic nga patik sama sa kilay, eyeliner, ug mga tattoo sa ngabil wala’y labot sa bag-ong mga lagda. Sumala sa bag-ong direktiba, bisan kinsa nga opisyal nga mapakyas sa pagsunod mag-atubang sa mga kaso nga administratibo. (Rem C. Agdon)