General Santos City – Ipakatag matud pa unya ang kinatibuk-ang 6,832 ka ihap sa mga pulis kaabag ang 1,364 ka ihap sa kasundalohan sa tibuok Region 12 atol sa adlaw sa Barangay ug Sangguniang Kabataan Eleksiyon (BSKE) sa Oktubre 30, 2023. Kana ang gilatag nga impormasyon ni PNP-12 Regional Director, BGen. Jamili Maracaeg ngadto kang DILG Secretary, Atty. Benjamin Abalos Jr. atol sa pag-anhi niini sa dakbayan sa General Santos ning nakalabay’ng adlaw, Oktubre 14, 2023 alang sa “Peace and Security Briefing” alang sa nagsingabot nga BSKE 2023 sa gitumbok nga petsa. Ang naasoy nga ihap sa kapulisan ug kasundalohan mao matud pa unya’y mohimo’g aktibong mga lakang batok sa bisan unsang hulga sa seguridad gikan sa mga dautang elemento atol sa adlaw sa pinili-ay.
Sa pikas bahin, gikabutyag sab sa pamuno-an sa PRO12- Police Regional Office, Region 12 nga sa kinatibuk-ang Rehiyon aduna sila’y natumbok nga 5 ka Barangay nga gideklara nilang “red areas” o peligrong mga lugar kabahin sa BSKE 2023 partikularmente nahisakop sa Sultan Kudarat area. Ang mga lugar nga deklaradong “red areas” nagpasabot nga aduna kini’y presensiya sa pipila ka pribadong armado nga grupo ug grabeng panag-indigay sa politika. Samtang, gi-awhag ni DILG Sec. Abalos ang liderato PRO-12 nga dugangan ang police visibility sa mismong ground ug makig-alayon sa mga opisyal sa Barangay aron matubag ang nagkadaghang krimen nga may kalabotan sa drugas. (Rey Ombana)