General Santos City – Gi-almahan gayud ni Polomolok Municipal Mayor BERNIE PALENCIA sa South Cotabato ang impormasyon nga adunay usa ka establisemento nga nagapangolekta og salapi gamit ang iyang pangalan.
Kauban ang kapulisan sa Polomolok PNP lakip ang mga personahe sa Business Permits and Licensing Office ug Civil Security Unit (CSU) gilayon nga giadtuan ni Mayor Palencia ang establiemento sa Okane nga nagpakonohay nga opisina sa Travel and Tours, apan sa aktuwal sukwahi ang gitanyag nilang serbisyo.
Nadiskubrehan nga dili travel and tours ang business operation niini tungod nakapaskil mismo sa gawas sa ilang establisimento ang gitanyag nga 35% nga tubo sa salapi nga gi-invest kung gusto nga matag adlaw ang pag-payout ug 40% usab kung i-lock-in sulod sa pipila ka buwan.
Matud sa Alkalde, susama gayud ang maong investment scheme sa Kapa. Gani, naabtan pa nila ang pag-invest sa usa ka tawo og P100,000 cash sa Okane Office.
Aduna pa’y usa ka babaye nga nagboluntaryong mitunol ug P2.4 Million a sa maong investment scheme. Tungod niini, giklaro ni Mayor Palencia nga dili gayud niya tugotan ang unsa mang pamuhunan o negosyo sa Polomolok, ilabi pa ang paggamit sa iyang pangalan. (Rem C. Agdon)