General Santos City – Hangtud karong panahona wala pa madakpi sa mga awtoridad o sa mga nahintungdang Ahensiya sa Gobyerno ang usa ka dakung “SALT CRODODILE” nga pipila ka buwan nang nakita o nadiskobre sa Sarangani Bay hadu-ol sa bukana sa Buayan River.
Asoy sa Media ni Shalimar Disomangcop sa PENRO Sarangani, kaniadtong Enero 2, 2025 takda unta nga maghimo og “trap” alang sa nasampit nga buaya sa usa ka lugar sa Brgy. Maribulan, Alabel, Sarangani Province partikular sa sapa nga bahin apan gisuspenso tungod sa nasinatiang kalit nga pagbaha nga mi-apaw pa ngadto sa kabalayan ang tubig-baha.
Gumikan sa maong hitabo, nakasabotan sa 2 ka team sa PENRO Sarangani nga dili una idayon ang paghimo og trap sa maong mananap-dagat, tungod posebling mibalhin kini og laing katago-an nga lugar, human natugaw sa bul-og sa tubig sa dakung baha.
Gi-angkon ni Disomangcop nga kulba ug dakong hagit ang pagdakop sa naasoy nga buaya tungod usa kini ka “wild” nga mananap ug idlas kung makamatikod og lihok sa palibot sa dagat nga iyang gipundohan ug mosalum dayon palayo.
Hinuon, gi-klaro daan sa PENRO Sarangani nga wala pa’y gikatahong adunay tawo nga naka-close encounter o napaakan nga tawo sa nasampit nga SALT CROCODILE.
Nunot niini, gi-awhag ni Disomangcop ang publiko nga magbinantayon o magma-igmat gayud sa tanang higayon o oras ug likayan una ang pagligo sa kadagatan diin nakita ang maong buaya, aron dili mamiligro ang kinabuhi.