General Santos City: Dakong kalipay karon sa mga taga-Kyondog, Barangay Kihan, lungsod sa Malapatan tungod opisyal nang gi-abrihan sa publiko ang dul-an Sais Milyones ka pesos (P6-M) hanging footbridge nga nagkonekta sa ilang sitio ngadto sa katapad nga Sitio Sofan, Barangay Pag-asa, sa Alabel ug sa mga kasumpay niini nga mga sityo sakop sa Kihan, Malapatan, mga kabukirang barangay sa probinsya sa Sarangani nga gipuy-an kasagaran sa mga kaigsoonang Lumad. Mismong si Congressman Steve Chiongbian Solon ang nanguna bag-uhay lang sa pag-turnover. 56-metros kini nga hanging footbridge, adunay 83-lineal metros slope protection, ug 35-metros sementadong dalan. Dako kaayong kalipay ni Kihan Kapitan Arnel Peco gumikan nabutangan na gyud sila og footbridge sa kadugay na nilang gihandum. Dili tiaw ang kahasol ug kabalaka kung mudako ang tubig-baha sa dakong sapa sa Sitio Kyondog, hilabi na matud pa sa ilang mga kabataang estudyante. Segun ni Vice Mayor Jun Salway nga naka-base sa Pag-asa, Alabel, igo ra nila gibalik nila Congressman Solon ang kwarta sa katawhan pinaagi sa mga mapuslanon nga programa ug proyekto. Lisod matud pa tuuhan ang musaad pa lang itandi sa naanay agi sa pagserbisyo. Ang pamilyang Chiongbian ang naila na matud pa sa maayong pagpangalagad.