General Santos City – Nakompiska gikan sa duha ka mga indibidwal ang iligal nga armas ug mga bala sa Purok 4, Brgy. Lagandang, Isulan, Sultan Kudarat ning milabay’ng adlaw PLTCOL JULIUS R MALCONTENTO, hepe sa Isulan Municipal Police Station niila sa mga suspek nga sila si alyas “Zai”, 31 anyos, minyo ug “Ben”, 27 anyos, minyo nga parehong residente sa nahisgutang lugar.
Matod ni PLtCol. Malcontento, nakadawat og tawag ang istasyon gikan sa usa ka kawani sa Brgy. nga adunay duha ka armadong indibidwal duol sa ilang lugar, mao nga giadto dayon kini sa kapulisan ug nakuha gikan sa ilang posisyon ang usa (1) ka .45 nga pistola, magazine nga adunay lima (5) ka bala, usa ka unit sa Magnum 357 revolver nga adunay lima (5) ka bala.
Kasamtangang anaa sa Isulan MPS station ang duha ka mga suspek dala ang mga nakumpiska nga ebidensiya alang sa tukmang disposisyon ug nag-atubang og kasong kalapasan sa RA 10591 o (Comprehensive Firearms and Ammunition Regulation Act).