General Santos City – Napatay sa usa ka amahan ang iyang kaugalingong anak human kini napusilan, atol sa komusyon tali sa duruha.
Ang amahang suspek ang nailhang si Nonito E. Beatisula, 80 anyos ug lumolupyo sa may Prk. Reformville, Barangay Calumpang Gensan, samtang ang biktimang namatay ang nailhan sa pangalang Ryan F. Beatisula, 36 anyos, wala’y trabaho ug residente gihapon sa maong lugar.
Base sa record sa Tambler PNP nga alas 6:31 kagabii, unang natigayon ang kumusyon tali sa amahang suspek ug anak niini sa ilang panimalay.
Una matud pa nga adunay hinagiban ang biktimang anak, nga bolo og mi-aksyon og tigbas unta sa amahan niini, hangtud sa wala’y mahimo ang amahan og gikuha ang usa ka armas nga .38 nga pistol ug dayon pusil sa biktima.
Nakaangkon og duha ka mga samad pinusilan ang biktima hinungdan sa iyahang kamatayon.
Dali usab nga mi-surender ang amahang suspek sa kwerpo sa kapulisan.
Nasayran usab pinaagi sa Tambler PNP nga adunay deperensya sa pangutok ang nahisgutang biktima. (John Rey Somido)
