Banga, South Cotabato – Kasong kalapasan sa R.A. 10591 ang atubangon sa usa ka mag-uuma nga nailang si Roland Talidong, 40 years old, minyo, ug residente sa Purok Libertad, Barangay Kusan, Banga, South Cotabato human kining nakuhaan ug armas kagahapong adlawa, June 2, 2023.
Subay sa report nga nahagpat gikan sa South Cotabato Police Office, nasuta nga nakadawat nalang ug report alas 9:30 sa gabie ang mga personnel sa Banga MPS gikan sa usa ka concerned citizen nga matud pa dunay nagpabuto ug pusil sa may bahin sa Prk. Mainuswagon, Brgy. Kusan, Banga, South Cotabato.
Gilayong girespondihan sa Banga MPS ang maong report ug pag-abot sa lugar, naaktuhan sa posisyon sa suspek ang usa ka unit sa caliber 40 Taurus pistol nga may serial number SCS90653 ug usa ka (1) steel magazine nga loaded ug 2 ka rounds sa buhing bala.
Sa gihimong imbistigasyon sa kapulisan, napakyas ang suspek sa pagpresentar ug dokumento sa iyang pusil maong siya gidakop.
Ang pusil ug ang dinakpan ang anaa na karon sa kustudiya sa PNP. (Noel Abelo Jr.)