Maguindanao del Norte – Mibalik sa sabakan sa gobyerno ang tulo ka mga miyembro sa Bangsamoro Islamic Freedom Fighters (BIFF). Partikular nga misurender ang mga nasampit sa kampo sa 40th Infantry (Magiting) Battalion sa Brgy Kabengi, Datu Saudi, Ampatuan, Maguindanao Del Sur, niadtong February 1, 2023.
Segun ni Lt. Col. Edwin Alburo, ang Commanding Officer sa 40IB nga ang mga misurender ang miyembro sa Karialan ug Bungos Faction sa BIFF nga may mga edad nga 31, 23 ug 27-anyos. Duha niini ang residente sa Datu Hoffer ug usa ang lumulupyo sa Mamasapano, Maguindanao.
Usa sa mga hinungdan sa pagsurender sa mga nasampit mao ang gutom, kalisod ug kakapoy samtang sila anaa sa kabukiran nagtago-tago sa tropa sa gobyerno.
Bitbit sa mga nasampit ang ilang mga armas nga gilangkuban sa Sniper Rifle, 7.62mm, Cal .50 ug usa ka GL, 40mm.
Gibutyag usab ni 601st Brigade Commander, Brigadier General Oriel Pangcog nga ilang gilauman nga may mga miyembro pa sa ekstremistang grupo nga musurender tungod sa walay puas nga operasyon nga ginahimo sa militar.
(Source: 6ID Faceboook page, photo courtesy of 6ID Kampilan)