General Santos City – Mikabat gayud sa 220 ka IP-beneficiaries gikan sa Upper Suyan, Malapatan nakadawat sa ilang 10 ka adlaw nga sweldo nga mokabat sa P4,030 matag usa gikan sa Department of Labor and Employment-Tulong Panghanapbuhay Sa Ating Disadvantaged/Displaced Workers Program.
Ang TUPAD Program sa DOLE nakabenepisyo sa mga indibidwal ug sa tibuok komunidad. Ang mga access trail roads nga motadlas sa nagkalain-laing purok ug sitio padulong sa barangay proper ang mano-mano nga nakubkoban niining 220 ka TUPAD beneficiaries.
Tungod niining bag-ong access road, ang 4 – 6 ka oras nga biyahe pinaagi sa pagbaktas, maagian na sa mga motorsiklo nga muputol sa oras sa pagbiyahe ngadto na lang sa 20-30 minutos.
Si Cong. Steve Chiongbian Solon nagpasalamat sa DOLE ug sa mga lokal nga opisyal nga gipangulohan ni Malapatan Mayor Jun Sumbo ug Upper Suyan Brgy. Kapitan Beltran Cawan sa pagtabang sa iyang buhatan sa pagdumala sa pagpatuman.
Ang TUPAD Program kay usa ka community-based emergency employment nga nagtabang sa mga bakwit ug huyang nga sektor sa katilingban.
Atong pasalamatan si Presidente Bongbong Marcos, Speaker Martin Romualdez, DOLE Sec. Bienvenido Laguesma, DOLE 12 Regional Director Joel Gonzales, ug Sarangani DOLE PD Louie Esparagoza sa ilang makanunayon nga suporta ug pasalig sa Sarangani Province.