ADUNA matud pa karo’y kinatibuk-an nga 1,646 ka sunod-sunod nga hinay ngadto sa kasarangan nga linog ang natala sa DOST-PHIVOLCS gikan sa alas 10:52 sa gabii niadtong Enero 19, 2026 hangtod alas-4:00 ang takna sa hapon karong adlawa, Enero 28, 2026 sa palibot sa lunsgod sa Kalamansig, probinsiya sa Sultan Kudarat.
Sa maong ihap, 507 ang na-ilatid nga adunay magnitude gikan sa magnitude 1.1 hangtod sa magnitude 5.9, samtang 63 ka pagyat-og ang nabati ug natala nga adunay parehas nga intensidad.
Tungod niini, nagpahinumdom ang Phivolcs ngadto sa publiko nga kanunay nga mangandam alang sa mga linog ug angay dayon himoon ang DUCK, COVER, ug HOLD atol sa aktuwal nga linog.
Ang mga katawhan nga nagpuyo daplin sa baybayon gipahinumdoman usab nga magbantay sa mga timailhan sa usa ka nagsingabot nga lokal nga tsunami o kalit nga pagbag-o sa lebel sa tubig-dagat; ug sa kadagu-ok nga tingog sa dagat ug sa gadahunog nga tingog sa mga balud.
Kung adunay bisan hain niini nga tima-ilhan ang madunggan o ma-obserbahan, gilayong mobakwit, mopalayo sa dagat ug mo-adto sa hataas nga lugar.
Ang DOST-PHIVOLCS nagpadayon sa pagpahigayon og adlaw-gabii nga pagmonitor sa linog sa nasampit nga dapit. (Rem Agdon)
News&Photos: lGU-Kalamansig/Phivolcs