Malungon, Sarangani – Mikabat matud pa sa kinatibuk-ang 12 ka mga tulay ang nagun-ob sa daku ug halapad nga baha nga nakasinati-an sa 10 ka Barangay sa Malungon, Sarangani Province ning nakalabay’ng Nobyembre 17, 2022 epekto sa walay pu-as nga ulan tibuok gabii sa Nobyembre 16.
Kana ang gikataho ni Municipal Engineer Marcos Antonio Zagales pinaagi sa usa ka meeting ngadto nila Malungon Municipal Mayor ATTY. Tess Constantino ug Sarangani Governor Ruel Pacquiao kagahapon sa buntag (Nobyembre 18, 2022).
Sa 12 ka nahugnong tulay, 3 niini ang mga konkreto ug mo-abot matud pa sa ₱ 112 milyones ang kantidad sa damyos niini.
Sa pagkakaron, mao matud pa’y tutokan sa Municipal Engineering kaabag ang mga heavy equipment units sa Provincial Engineering Department ang pagmugna og pipila ka alternatibong mga dalan nga maoy temporaryong maagi-an sa mga residente ug sa mga produktong agrikultura padulong sa lungsod ug pabalik sa ilang lugar.
Nahimo karong problema ni Mayor Constantino ug Gov. Pacquiao ang pagkalap og pundo alang sa rehabilitasyon o pagtukod subli og bag-ong mga tulay, tungod bag-ohay lamang matud pa natapos ug na-ipasar sa Sangguniang Bayan (SB) ug Sannguniang Panlalawigan (SP) ang Annual Investment Plan (AIP) o Annual Budget sa Munisipyo ug Kapitolyo alang sa tuig 2023 nga dili na pwedi ma-utro.
Magla-um na lamang matud pa sila karon nga makakuha o mabutangan kini og pundo sa National Government, hilabi na nga anaa pa sa padayong pag-plastar og Annual Budget sa nasud ang Senado alang sa mosunod nga tuig.
Samtang, lili-on matud pa usab ni Gov. Pacquiao kung aduna ba’y surplus fund sa Provincial Government nga kakuha-an og pundo alang sa “supplemental budget” sa pagtukod subli og bag-ong mga hanging bridges sa Malungon.
Human sa nasampit nga meeting dungan nga nag-actual inspection sila Mayor Constantino ug Gov. Pacquiao sa mga tulay nga gilumpag sa baha.
(Source: LGU Malapatan)