Dakong tabang para sa katawhan sa probinsya sa Sarangani ang Super Health Center kung asa gisugdan ang pagtukod sa Lungsod sa Kiamba ug laing usa ang ibutang sa Glan.
Sumala kang Senator Bong Go nga ang Super Health Center ang makonsiderang gamay nga hospital apan mas dako kung itandi sa Rural Health Unit (RHU) kung asa adunay birthing facility, igong himan sa laboratory sama sa xray ug uban pang laboratoryo sa dugo.
Pinaagi sa super health center, mahatagan ug paunang examinisyon ang mga pasyente nga adunay ginabati ug dili na kinahanglan pa nga dalaon sa kasikbit nga lugar nga adunay mga hospital.
Dugang pamahayag ni Senator Bong Go nga kinahanglan gyud nga mag-invest ang nasud para sa health care system para sa katawhan hilabina nga adunay mga pandemya nga nasinatian.
Mukabat sa 305 nga mga super health center ang nakatakdang itukod sa tibuok nasud kung asa ang department of health maoy natahasan nga mag-supervise niini kaabag ang mga local government unit.
Prayoridad nga tukuran ug super health center mao ang mga lagyong dapit nga dili dali ang pag-adto sa mga hospital aron nga makapa-check up.
Kalabot niini gibutyag ni senator bong go nga gikan sa 305 nga super health center nga itukod sa nasud, 12 niini ang ibutang sa Rehiyon 12.
Saysay niini nga lahi usab ang Malasakit Center nga naunang nahimong balaud kung asa kini ang usa ka one stop shop para sa mga pobre nga mangayo ug tabang pinansyal kung asa anaa sulod sa usa ka gambalay ang mga buhatan sa DSWD, Philhealth, PCSO ug DOH.
Pinaagi niini mas dali alang sa katawhan ang pagpangayo ug tabang ug dili mausik ang panahon sa pag-proseso sa mga bayrunon.
(Alfredo Madas Jr.)
