General Santos City–Mukabat sa 11 ka mga establishemento ang gisilbihan ug order sa mga personahe sa Social Security System (SSS) atol sa gihimong 2022 Run After Contributions Evaders (RACE) nga gihimo dinhi sa GenSan sugod alas 8:30 hangtud alas 10:30 ang takna kaganinang buntag.
Ang aktibidad gipangunahan sa mga tag-as nga opisyal sa SSS ilawom sa Mindanao South II Division, sa pagpanguna ni VP Redentor Viola, Atty. Zavier Palao, Officer in charge sa Operations Legal, Atty. Glenn Mar Acas, SSS-Gensan Branch Acting Head Jose Froilan Garcia ug uban pang mga branch Head sa tanang lugar nga sakop sa Mindanao South II division.
Sumala ni VP Viola, nga ang aktibidad nagtumong nga pahinumduman ang mga employer nga bayran ang kontrobusyon sa ilang mga empleyado ug ideklara ang saktong ihap sa ilang mga empleyado.
Nasayran nga sagad sa mga violations sa mga gipailawom sa RACE mao ang non registration ug ang dili regular nga pagbayad sa mga employer sa kontribusyon sa ilang mga empleyado.
Subay sa giserved nga order sa SSS ngadto sa mga employer, kinahanglan ilang i-comply ang ilang responsibilidad sa SSS sama sa pagbayad sa kontrobusyon sa ilang empleyado ug pag-enroll sa ilang mga empleyado sa SSS.
Dugang pa sa opisyal nga higayon dili pa ma-comply sa mga employer ang ilang obligasyon sa SSS sulod sa 15 ka adlaw, ila kini ipasa ang case folder ngadto sa operation legal nga gipangunahan ni Atty. Zavier Palao, sila na usab maoy maghimo ug final demand diin hatagan ang mga employer ug laing 10 ka adlaw aron magcomply. Kung dili pa gyud makacomply, dinhi na sila pasakaan ug kaso ngadto sa piskalya.
Hinuon gibutyag ni VP Viola nga atol sa ilang pag-served sa order nahimong cooperative man ang mga nahisgutan.
Nagtuo usab si VP redentor Viola nga ma-comply gyud sa 11 ka mga establishemento ang ilang obligasyon sa SSS ayha mahuman ang 15 ka adlaw nga lugway nga gihatag kanila. (Alfredo Madas Jr.)
