Maitum, Sarangani Province – Usa ka miyembro sa Communist Terrorist Group (CTG) ang mi-surrender sa Barangay Zion, Maitum, Sarangani Province ning nakalabay’ng adlaw sa Septiyembre 6, 2023.
Gikabutyag, nga nahimong posible ang pagsurender sa maong CTG nga giilang si “Yoyo” sa tabang sa mga personahe sa Maitum Municipal Police Station, Sarangani Police Provincial Office, RMFB 12, Regional Intelligence Division 12, Bravo Coy 38th Infantry Battalion, Philippine Army 6th Infantry Division ug MAPIO SCMSO.
Ang alyas “Yoyo” kay kanhi miyembro sa teroristang grupo gikan sa grupo sa West Musa Guerilla Front 73 Far South Mindanao Region.
Dungan sa iyang pagsurender, lakip sab niyang gidala ang usa ka 12-gauge homemade shotgun, usa ka improvised AK ingram nga adunay magazine ug 10 ka bala.
Pormal usab nga gipaila-ila ang Kanhi Rebelde (FR) sa Lokal nga Panggamhanan sa Maitum, Sarangani nga nakadawat dayon og inisyal nga tabang gikan ni Mayor Alexander Bryan Reganit.
Si Police Brigadier General Jimili L Macaraeg, Regional Director sa PRO 12 nanghinaot nga ang ubang sakop sa CTG mosunod sa ehemplo ni alyas “Yoyo” nga mitahan alang sa kalinaw, kauswagan ug kalinaw sa komunidad. (Rey G.Ombaña)
Photos: PRO12