Cagayan de Oro – Gipahalipayan ni City Mayor Rolando ‘Klarex’ Uy ang garbo nga produkto sa Cagayan de Oro City Amateur Boxing Team nga si Carlo Paalam human siya nakasulod sa quarterfinals sa nagpadayong 2024 Paris Olympics.
Kini human giparot ni Paalam ang kaatbang nga si Jude Gallagher sa Ireland pinaagi sa unanimous win, 5-0, atol sa ilang dula sa 57 kilograms sa Round of 16 niadtong Miyerkules sa gabii, Hulyo 31.
Sa iyang kadaugan, malaumon si Mayor Klarex nga maangkon sa hingpit ni Paalam, silver medalist sa Tokyo Olympic Boxing, ang gikahinaman nga gold medal nga maoy gipangandoy sa matag Olympian.
Ang kalampusan ni Paalam dili lang dakong garbo ug dungog sa nasud Pilipinas, apan ilabina sa Cagayan de Oro City Amateur Boxing Team, diin asa siya nagsugod sa iyang karera sa boksing.
Sunod nga makaatbang ni Paalam sa quarterfinal round mao si Charlie Senior sa Australia. Kung palaran nga modaog si Paalam, sigurado na siya nga makaangkon og bronze medal.
News and photo courtesy of CIO CDO