Gumikan sa hangyo sa Gingoog City Task Force for COVID-19, gipakanaog gipakanog gilayon ni Gobernador Bambi Emano ang Executive Order GYVBE No. 2021 – 13 nga nagmando nga ipailawom sa Modified Enhanced Community Quarantine (MECQ) ang syudad sa Gingoog sugod Hunyo 16 – 30, 2021 aron hingpit nga mapugngan ang pagkuyanap sa COVID-19 sa maong lugar.
Ang maong kamandoan sa Gobernador nunot sa pag-uyon sa Northern Mindanao Regional Inter – Agency Task Force for the Management of Emerging Infectious Diseases (NMRIATF – MEID).
Unod sa kamandoan nga epektibo sa nasangpit nga petsa ang strikto nga ipatuman ang MECQ guidelines sa Gingoog City hilabina ang curfew ug pagdili sa mga dinagko nga panagtapok.
Gimando usab ni Gobernador Bambi Emano ang hugot nga kooperasyon sa Local Government Unit sa Gingoog ug sa Philippine National Police aron hingpit na mapatuman ang MECQ.
Niining padayon gihapon ang pakigbatok sa makapatay nga virus gihangyo karon ni Gobernador Bambi Emano ang kooperasyon ug pagsabot dili lamang sa mga lumulupyo sa Gingoog apan sa tanang Misamisnon. (Jebsen Patlunag, PIO)
(Source: Misamis Oriental Provincial Information Office Facebook page)