General Santos City – Kagabii, December 1, 2022, sa may Oval Plaza, General Santos City, opisyal na nga gi-ablihan ang Pasko sa Gensan 2022 Bisan pa man nakasinati og katag-katag nga pag-ulan tungod sa ITCZ ang syudad, wala kapugngi ang engrandeng opening ceremony sa tinuig nga kasaulugan alang sa Pasko sa Gensan.
Sa halos duha ka tuig nga wala’y face to face nga selebrasyon tungod sa pandemya nga mugna sa COVID-19, karong tuiga dako ang kalipay sa mga taga-Gensan alang sa maong selebrasyon.
Sa temang “Ligaya Galing sa Puso para sa bawat Heneral”, pormal nga gi-ablihan sa lokal nga kagamhanan ang selebrasyon kauban ang Department of Education-Gensan.
Gipangunahan ni Gensan City Mayor Lorelie G. Pacquiao ang selebrasyon kauban ang mga opisyal sa syudad ug opisyal sa DepEd Gensan sa pagpanguna ni Schools Division Supt. Romelito G. Flores, CESO V.
Subling gipangunahan sa DEPED-GSC ang Pasko sa Gensan.
Nahimong engrande ang pag-abli niini kon diin gipakita sa mga magtutungha sa mga nagkadaiyang tunghaan sa syudad ang ilang mga talent.
Sa nahimong pamahayag ni Mayor Pacquiao, gipahinomdom niini ang tinood nga kahulugan sa Pasko.
“Usa kini ka selebrasyon sa panaghiusa ug pagminahalay. Atong wagtangon ang dili pagsinabtanay sa atong pamilya, trabaho, ug relasyon sa ubang tawo…kining pasko sa Gensan dako kini nga kadaogan kanatong tanan, hinaot ko nga magmalipayon kita sa pasko ug sa bag-ong tuig,” ayon sa alkalde. Sumala pa sa Mayor.
Nahuman ang programa pinaagi sa usa ka fireworks display.
Opisyal usab nga gi-ablihan ang Oval Flea Market. Ang Pasko sa Gensan ang isaulog gikan sa Nobyembre 28 hangtud sa Enero 6, 2023.
#PaskoSaGenSan2022 #depedtayogensan
(Source: DEPED-GSC)