Cebu City – Gihangyo sa mga sakop sa Partido Demokratiko Pilipino Lakas ng Bayan (PDP Laban) si Pres. Rodrigo Duterte nga modagan pagkabise presidente sa eleksyon sunod tuig.
Gawas niana, ila usab gihatagan og katungod si Duterte pagpili sa iyang ka tandem alang sa pagka presidente.
Ang naasoyng hangyo gisabak sa resolusyon nga giaprobahan sa unang meeting sa PDP Laban National Council gikan sa 2016.
Gipapirma sa resolusyon ang tanang pisikal nga mitambong sa tigum samtang kadtong pinaagi lang sa Zoom, padad-an og kopya sa ilang opisina aron makapirma.
Nagsunod pagpirma sila ang vice chairman sa PDP Laban nga si Secretary Alfonso Cusi, acting secretary general Melvin Matibag ug vice president for international affairs Raul Lambino.
Suma pa ni Lambino, magpahigayon pa sila og national convention sa mga membro sa Partido.
Ipahigayon kini human sa National Council Meeting sa Hulyo 16 ug sa National Assembly sa Hulyo 17 diin himoon ang pagpili og bag-ong mga officers. Â (Jhon Tadlip/JTY)
(News & photo courtesy of PDP-Laban)
