Dead on the spot ang duha ka mga drayber sa motorsiklo samtang nangalagpot ang ilang tagsa-tagsa ka mga angkas human nga nagbangga-anay alas 2:35 sa sayong kaadlawon sa tunga sa karsada sa Purok-1 Barangay Lumatab, Maco, Davao de Oro. Giila sa Maco Municipal Police Station ang duha ka driver nga sila Irene Mahinay, 27-anyos ug Mervin Sanopao, 20-anyos. Samtang grabing nasamdan ang tagsa-tagsa nila ka mga angkas nga silang Merasol Jumalon, 22-anyos ug Carl Trixie Pauya, 17-anyos.
Gikan sa Compostela ang motorsiklo nga gimaneho ni Mahinay nga pauli na unta sa Brgy Binuangan sa lungsod sa Maco apan sa tunga mismo sa karsada na-sungag kini sa kasugat nga motor nga gimaneho ni Sanopao.
Tungod sa kakusog sa impact nangadugmok ang atubangang bahin sa duha ka motorisklo nga miresulta sa diha-diha nga kamatayon sa duha ka drayber. Samtang ang duha ka angkas gipangdala sa Pantukan Provincial Hospital.
(News & photo courtesy of PIO-MACO PNP)