Manayunan ti maysa pay a bus transportation company ditoy Ilocos Norte ti agbiahe nga agturong idiay Manila ken umay ditoy Ilocos Norte.
Segun ken ni Atty. Nikki Pilar, mangidadaulo ti Metro Ilocos Norte Council wenno MINC, daytoy ket ti Florida Bus Line.
Mainaig iti daytoy, imbatadna nga iti agdama ket addan ti dua a transportation company ditoy probinsia nga addaan ti biahe a Laoag-Manila ken Manila-Laoag.
Inlawlawagna a naiget a masursurot ti Executive Order nga inyetnag ni Gob. Matthew Marcos Manotoc pakaseknan ti pannakaipalubos kadagiti nadakamat a kompania nga agbiahe.
Inbunannagna a karaman ditoy ti panangisubmitir dagiti bus companies iti manifesto dagitoy duapulo ket uppat nga oras sakbay ti naituding a panagbiaheda.
Kunana a daytoy ket gapu ta mangipaayda ti sertipikasyon kadagiti bus mainaig iti biaheda nga ipakitada iti border a mangipaneknek a naikoordinar ket nakasagana dagiti maseknan nga LGU a mangawat kadagiti kakailian.
Impalgakna a kadagiti sumangpet ditoy probinsia ket raemen ti gobierno probinsial dagiti protocol ken pagalagadan nga ipatpatungpal dagiti madumaduma a Local Government Units wenno LGU’s ditoy probinsia rason a nasken a pakaammoan nga umuna dagiti kakailian dagiti bukudda nga ili wenno siudad iti isasangpetda. Innayon ni Pilar a mangrugi ita nga aldaw ket inaldawen nga agawat ti booking dagiti nadakamat a kompania kadagiti interesado nga agbiahe idiay Manila wenno dagiti sumangpet ditoy probinsia. (Ronald Domingo, RPN DZRL Batac Correspondent)
(Source: Provincial Government of Ilocos Norte)