Nakatakda nang ipasaka karong adlaw’ng Lunes, June 21, ang patung-patong nga kaso batok kang kanhing boxing champion nga si Eden Sonsona, human nga maaresto kini sa gikasang drug buy-bust operation sa mga otoridad.
Sa pakighinabi, giasoy ni GenSan City Police Office-Station 2 commander, P/Major Patrich Elma nga kasong may kalapasan sa Section 5 ug Section 11 sa RA 9165 o Comprehensive Dangerous Drugs Act of 2002 ang ipasaka batok sa dinakpan.
“Today, Monday, June 21, we’ll be filing (violation of) Section 5 and Section 11 sa City Prosecution for inquest proceeding,” ang tipik sa pamahayag sa opisyal.
Una nang gikumpirma ni Elma nga dugay nang gimonitor sa mga otoridad ang kanhing boxing champion nga si Eden Sonsona, may kalabutan sa illegal drugs activities niini.
Atol sa gikasang operasyon, narekober kang Sonsona ang ang tulo ka sachet sa gituhuang shabu ug ang ₱ 500 buy-bust money.
Ang 32-anyos nga si Sonsona ang naaresto atol gipahigayong operasyon sa kapulisan, sulod sa Chinese Cemetery sa Purok Bagangga, Barangay Apopong. (John Rey Somido)