Subling nagpahimangno ang Sarangani Provincial Health Office nga nagpabiling bawal ang “close contact” sa mga LSI/locally stranded individual, ROF/returning overseas Filipino ug sa tanang indibidwal nga naka-quarantine.
Segun ni Doctor Arvin Alejandro, ang provincial health officer, panigurado nga walay matakdan sa komunidad, sabton usa sa pamilya ug sa nahingtungdan nga bawal una sila magkaduol sulod sa mga adlaw nga gimando kanila sa taga-health office nga mag-kwarantina.
Ma-negatibo man ang resulta sa test nga gibuhat sa gigikanan nga lugar ug nag-quarantine na didto, dapat seryoso gihapon kining mupailalum sa proseso sa quarantine pag-abot dinhi aron masiguro nga wala kini bitbit nga Coronavirus tungod dili masiguro kung nitapot kini atol sa pagbyahe.
Nagpabilin ang abiso sa LGU Sarangani sa pamunuan nila Governor Steve Chiongbian Solon ug sa pito (7) ka mga mayor, sa pagsuporta nila Vice Governor Elmer De Peralta, tanang board member ug nila Senador Manny ug Congressman Ruel Pacquiao, nga walay diskriminasyon ipakita ang mga residente ngadto sa ilang mga silingan nga namalik sa ilang hometown. Dili sala ang pagbalik bisan wala pa nahuman ang Coronavirus pandemic gumikan nakabatyag sila og kasiguruhan sa ilang kahimtang kung anaa sila sa ilang yutang natawhan.
Samot na nga dili nila sala ingkaso mag-positibo sa COVID-19.
Apan gikinahanglan matud pa nga mutuman sila sa mga patakaran aron magpabiling protektado ang ilang mga kabanay ug ang komunidad. Walay magkumpyansa aron dili mahitabo ang local transmission kon pagtakudanay.
Dakong pag-welcome ang gibuhat sa LGU maong angayan lang kini nga balusan usab og minaayo pinaagi sa pagtuman sa mga protocol.
Sa talaan sa PHO Sarangani, tulo (3) ang aktibo nga positibo karon sa Coronavirus sa Sarangani Province, puros mga LSI. Nadungag kagabii ang LSI taga-Malapatan, baynte-sais (26) anyos, babae, gikan sa Parañaque didto sa Metro Manila.
Niaging adlaw nga Byernes, taga-Maitum, kwarentay-kwatro (44) anyos, babae, gikan sa Tondo didto gihapon gikan sa Maynila.
Ang Glan nga LSI gikan Cebu ang padayon pang nagpa-recover. Kadtong OFW taga-Alabel ang nag-negatibo na kini sa ikaduhang swab test. Naghulat na lang sa resulta sa iyang ikatulong (3rd) swab test aron paulion na sa ilang panimalay.
Gapaniguro nila Maitum Mayor Bryan Reganit ug Malapatan Mayor Jun Sumbo nga gikan sa airport hangtud sa quarantine facility, wala nay myembro sa pamilya nga nakaduol sa maong duha ka LSI, maong walay angay kabalak-an.
Anaa pud sila sa stable nga kondisyon. Apan dili gihapon magkumpyansa hinungdan nga makanunayon ang pag-awhag ni Governor Solon sa mga katawhan nga dili kalimtan ang pagsuot og face mask, dos metros (2m) nga physical distancing ug paghugas sa mga kamot. Dili na mugawas og balay kung walay importanteng tuyo, ug mu-iwas usa sa tapok-tapok sa tao.
Daghan pang muabutay nga mga LSI ug returning OFW. Matud pa ni Dr. Alejandro, kung dili gyud ka-agwanta ang pamilya, pwede kining muduol basta tres metros (3m) lang ang gilay-on sa naka-kwarantina ug dapat naka-face mask.
Kadtong maghatud og pagkaon, ibilin lang sa lamesa. Sa ilang pagtuon, pwedeng matakdan ang tao matud pa kung kaisturya niini ang nag-positibo sulod sa kinse (15) minutos nga pag-isturya usa ka metro (1m) ang ilang distansya, maliban na lamang kung pulido nga nakasul-ob og PPE suit.