Cebu City- Dul-an na sa lima ka libo ang gidaghanon sa mga nataptan sa coronavirus disease o COVID-19 sa dakbayan sa Sugbo.
Mao kini gianunsyo sa CHO o City Health Office sa mga sakop sa media.
Sumala pa sa CHO, nakatala na sila og 4,962 ka kompirmadong kaso sa COVID-19 hangtod gahapon human madugangi og 131.
Gawas niana, misaka usab ang ihap sa mga namatay ngadto sa 156 tungod sa unom nga nadugang nga gikan sa brgy. Mambaling, Duljo-Fatima, Basak-San Nicolas, Kamputhaw, Ermita ug Suba.
Nakatala usab ang siyudad og 157 ka naulian hinungdang nahimo nang 2,596 ang tanan.
Sa maong gidaghanon, 41 ang taga brgy. Duljo-Fatima, 23 sa Kamputhaw, 20 sa Punta Princesa, 14 sa Basak San Nicolas; 12 sa Bulacao; pito sa Pardo; tagun-om sa Inayawan, Lahug ug Mambaling; tagutlo sa Calamba ug Tisa; tagurha sa Apas, Kalunasan, Mabolo ug Sawang Calero; ug tagsa sa Basak Pardo, Cogon-Pardo, Labangon, Pahina Central, Pasil, Tinago, Talamban ug T. Padilla.
Samtang sa bag-ong mga kaso, nag-una ang brgy. Sta. Cruz nga adunay 18 nga gisundan sa Lahug nga mitala og napu, dayon ang Guadalupe nga adunay walo; tagun-om sab sa Punta Princesa ug Sambag 2; tagilma sa Basak-San Nicolas, Mabolo, Pardo, Talamban, Tinago ug Tisa; tagup-at sa Capitol Site, Labangon ug San Nicolas Proper; tagutlo sa Apas, Carreta ug Duljo-Fatima; tagurha sa Basak-Pardo, Calamba, Kamputhaw, Cogon-Pardo, Hipodromo, Lorega, Quiot, San Roque ug Sambag 1; ug tagsa sa Bacayan, Buhisan, Bulacao, Cogon Ramos, Kalunasan, Kamagayan, Kasambagan, Mambaling, Pahina San Nicolas, Pahina Central, San Jose ug Suba.