Gibutyag ni Department of Education (DEP.ED) Eleven Spokesperson Jenelito ‘Dodong” Atillo nga mikabat na ngadto sa kapin dose ka libo ka mga personahe sa DepEd XI ang nabakunahan na batok Covid-19 sa tibuok Davao Region.
Sa pinaka-ulahing datos sa ahensya, naa sa 10,201 na gikan sa 42,242 ka mga teaching personnel ang nabakunahan sa 1st dose. Samtang 227 ang nabakunahan sa mga health personnel, dunay 499 sa 2,992 ka mga principal ug school heads ug 1,138 gikan sa 3,149 ka non-teaching personnel ang nabakunahan.
Hinuon, anaa pa lamang sa 412 ang nakahuman sa 2nd dose diin 78 niini gikan sa dinhi sa dakbayan sa Davao. Nanghinaot si Atillo nga mahimong paspas ang pagbakuna sa ilang mga personahe labi na nga mitabang ug misuporta ang mga LGU ngadto kanila.
Nagpasalamat usab ug dako si Atillo kang Davao City Mayor Inday Sara Duterte nga nag-gahin gayud kini ug bakuna alang sa mga teaching ug non-teaching personnel sa dakbayan sa Davao, kung asa, anaa sa upat ka libo ang nabakunahan niadtong milabay nga Sabado ug Domingo.
(Source: DepEd XI)