Dos personas ya iri cuando dos motorsiclo ya man bangga-an na camino nacional na provincia del Zamboanga Sibugay.
Si Coronel Eduard Mallo, director provincial del pulisiya na Zamboanga Sibugay, ya nombra con el maga victima como canda Stepahnie Osias, veinte tres años y Robert Rey Magbanua, veinte sinco años el edad.
Asegun con Mallo cay base na investigacion, canda Osias y Magbanua igual ta maneja motorsiclo cuando ya man bangga-an sila maga alas ocho sincuenta del Martes denoche na medio del camino nacional na Barangay Timuay Danda municipio de Kabasalan, Zamboanga Sibugay.
Asegun con Mallo cay si Osias ya sustene irida na cabesa myentras hinde grabe el irida ya sustene si Magbanua.
Canda Osias y Magbanua ya lleba na un privado hospital na municipio de Kabasalan para el curada medical. (B. Garcia)