Cebu City – Gipangita na sa kapolisan ang tawo nga nag-teks sa mga nag-okupar sa division office sa DepEd sa Cebu City nga adunay bomba sa building.
Suma pa sa deputy director for operations sa CCPO, Lt. Col. Wilbert Parilla, supak sa balaod ang pagpanghadlok nga may bomba bisag dili tinuod.
Mao kini ikatulong higayon nga nakadawat ang maong opisina og bomb threat pinaagi sa text message.
Ang una nahitabo niadtong Pebrero 2020 ug ang ikaduha pagka Marso 4.
Ang ikatulo gahapon sa buntag gikan sa wala magpailang sender ug nadawat ni Dr. Rhea Mar Angtud, ang schools division superintendent.
Suma pa sa officer-in-charge sa DepEd Cebu City, Bernadette Susvilla, tungod kay bakasyon pa man si Angtud, gipasaka nila ang mensahe aron makatawag og panabang sa mga awtoridad.
Ang mga sakop sa EOD o Explosive Ordnance Division, nga misiksik sa tibuok bilding sa division office sa Imus Ave. brgy. Day-as, walay nakitang bomba.
Gideklarar sa mga awtoridad nga clear ang division office nianang alas 11 sa udto o human sa tulo ka oras nga search. (Jhon Tadlip/JTY)
(News & photos courtesy of DepEd Cebu City)