Nadawat na sa mga kwalipikadong displaced worker sa probinsya sa Sarangani ang cash assistance nikantidad og ₱ 3,260 kada usa gikan sa DOLE-TUPAD program. Si Bernardo Agor, taga-Kanalo, Maasim, ang nidawat bag-uhay lang og ₱ 3,260 cash pinaagi sa Pera Padala. Kanhi syang trabahante sa usa ka mall sa Gensan.
Malipayon ang Public Employment Service Office/PESO Maasim sa pagpanguna ni Mayor Zyrex Pacquiao nga ubay-ubay sa mga taga-Maasim ang naka-benipisyo sa maong programa, kadtong labing naapektuhan sa mga nangagi nga lockdown. Sila kadtong mga underemployed, self-employed, home-based workers, vendors ug anaa sa grupo sa transportasyon sa probinsya sa Sarangani.
Natigayon matud pa kini tungod sa pagpaningkamot nila Governor Steve Chiongbian Solon ug sa PESO Province Manager Ms. Glenda Revaño, sa dakong pagtabang sa DOLE Region 12 ug DOLE Sarangani Field Office.
Kahibaluan nga adunay nadungag dul-an 600 kabuok mga taga-Sarangani ang naka-benipisyo sa programa sa DOLE-TUPAD. Sila ang 4th batch. Ang nanglabay nga tulo (3) ka batch ang libuan pud ka mga Sarangan ang naka-benipisyo.
Una ng nalipay ang sobra duha ka libo (2K+) kabuok myembro sa transport sector sa Sarangani Province human nga nakadawat napud sila og dungag ayuda gikan sa Provincial Government sa Sarangani ning nagpadayon karon nga pandemya.
Laing kaayuhan na usab ang ilang naangkon. Tagpulo ka kilo (10 kilos) nga bugas ug usa (1) ka tray sa itlog manok ang na-angkon sa matag myembro. Sa direktiba ni Governor Solon, gituyok nila Program Manager Merly Nebres, ang presidente sa STARTED kon Sarangani Transport Alliance for Reform and True Development, kuyog si Operations Officer Ms. Sharon Esportuno, ang tanang lungsod sa Sarangani aron apuran sa maong mga sinakong bugas ug trays sa mga itlog para panud-an ang hut-ong sa transportasyon.
(Public Information Office – Sarangani)