Gatosang benepisyaryo sa Tulong Panghanapbuhay para sa Ating Disadvantaged/Displaced Workers (TUPAD) sa dakbayan sa Cagayan de Oro ang midawat sa cash assistance gikan sa Department of Labor and Employment (DOLE) ug pinaagi sa inisyatibo ni Deputy Speaker Rufus Rodriguez.
Kagahapong adlawa, mukabat sa 516 beneficiaries ang nakadawat sa ₱ 3,650 kada usa kanila o balor ₱ 1,883,400 ang suma total nga nahatag sa mga displaced workers kansang apektado ang panginabuhian tungod sa COVID-19 pandemic. Ang badyet sa maong programa usa ka alokasyon ubos sa Bayanihan 2.
Nanguna sa cash distribution si Councilor Jocelyn “Bebot” Rodriguez, Barangay Nazareth Chairman Maximo “Jonjon” Rodriguez ug mga personahe sa DOLE ug 2nd district Congressional office.
Dako ang pagpasalamat sa mga TUPAD workers kay nahatagan sila ug bulig aron maka-palit sa ilang inadlaw nga panginahanglan. Ang uban kanila, mi-plano nga gamiton ang nadawat nga salapi aron makatukod ug gamay nga negosyo.
Kahinumduman nga unang tulo ka-batch sa TUPAD ang nahatagan sa cash employment sugod Enero ning tuiga. Dul-an 1,476 ka benepisyaryo ang nakadawat sa ₱ 6,000 o balor ₱ 8.856 million ang naapod-apod sa mga benepisyaryo. Sa dugang benepisyaryo kagahaon, muabot na sa kapin 2,000 ang ihap sa TUPAD beneficiaries o ₱ 10.5 million ang na distribute.
Gilaoman nga laing batch sa TUPAD beneficiaries pinaagi sa opisina ni Cong. Rufus ang makadawat sa maong assistance. Prioridad sa nasampit nga programa ang mga Kagay-anong napapahawa sa trabaho-an tungod sa krisis sa COVID-19. (Office of the 2nd Congressional District, CdeO)