Nakabenepisyo ang Dansullan Farmers Multi-Purpose Cooperative (DFMPC) human madawat ang P300,000 nga Chicken Egg Production ug Marketing Project gikan sa Department of Agrarian Reform (DAR) atol sa gipahigayong MOA Signing ug Turn-over Ceremony nga gitambongan ni Governor Darel Dexter T. Uy.
Ang 240 ka miyembro sa kooperatiba maoy direkta nga makadawat sa egg machines, 192 ka ready-to-lay chickens, feeds, kagamitan, ug materyales sa pagtukod sa poultry house, mga hinabang nga makatabang sa pag-uswag sa ilang panginabuhian ug pagdugang sa kita sa komunidad.
Sumala ni Provincial Agrarian Reform Office II Daisy Dell S. Digamon, ang Dansullan usa sa gipili tungod sa ilang kapasidad ug panginahanglan, hinungdan nga gipasidunggan sila nga benepisyaryo sa proyekto ubos sa Partnership Against Hunger and Poverty (PAHP). Gipasiugda niyang angay ampingan sa DFMPC ang proyekto kay daghang barangay ang mitinguha niini apan sila ang natagaan.
Gidayeg ni Gov. Uy ang DAR sa paghatag sa dakong oportunidad sa mga mag-uuma sa Dansullan ug naglaum nga ang proyekto makatabang sa pagpalig-on sa ilang produksyon ug makahatag og bag-ong panguhaan sa kita. Iyang gipadayag nga ang suporta sa probinsiya padayon aron mahatagan ang mga mag-uuma og dugang ayuda ug farm machineries alang sa mas taas nga ani ug mas lig-on nga panginabuhian.(IKEN B. GULLEM)
Source: Zamboanga del Norte Provincial News Network