Gilauman nga mas mapreserbar ang ani, maminusan ang pagkalugi ug mas mapalapad ang merkado sa mga mag-uuma sa mangga sa Zamboanga del Norte pinaagi sa pagtukod sa ₱3.5-milyon nga Mango Consolidation Center sa Barangay Upper Irasan, Roxas.
Naa na sa 18 porsyento ang accomplishment sa proyekto nga gitukod sulod sa Zamboanga del Norte Provincial Agri-Industrial Center (ZN-PAIC).
Sa higayon nga mahuman, mahimong sentro ang pasilidad sa pagtipon, pagdumala ug pag-andam sa mga ani sa mangga gikan sa nagkalain-laing lungsod sa probinsya sa dili pa kini dad-on ngadto sa merkado.
Importante kini alang sa mga mag-uuma tungod kay makatabang ang mas organisadong post-harvest handling sa pagpreserbar sa kalidad sa ilang ani ug pagpakunhod sa mga manggang madaot o dili na mapamaligya.
Dugang pa, pinaagi sa pagkonsolida sa mga ani, mahimong mas sayon alang sa mga mag-uuma ang pag-atubang sa dagkong buyers, traders ug processors. Mahimo usab kini nga maghatag kanila og mas daghang oportunidad nga makasulod sa mas lapad nga merkado ug makakuha og mas maayong presyo alang sa ilang produkto.
Gilauman usab nga mapalig-on niini ang koneksyon tali sa mga mag-uuma ug mga potensyal nga mamumuhunan ug negosyo nga nanginahanglan og mas organisado ug kasaligan nga supply sa mangga.
Alang sa mga mag-uuma, ang maong pasilidad mahimong dugang nga suporta gikan sa produksiyon hangtod sa pagbaligya—dili lamang aron madugangan ang gidaghanon sa ani, apan aron mas mapataas usab ang bili niini sa merkado.
Padayon ang pagtukod ug monitoring sa proyekto aron masiguro nga matuman kini sumala sa gitakdang kalidad ug iskedyul.
Sa higayon nga maoperasyonal, gilauman nga ang Mango Consolidation Center mahimong dugang nga oportunidad alang sa mga mag-uuma sa Zamboanga del Norte nga mapalambo ang ilang panginabuhian pinaagi sa mas maayong pagdumala sa ani ug mas lig-on nga access sa merkado.(IKEN B. GULLEM)
Source: Zamboanga del Norte Provincial News Network