Nagpalig-on sa ilang organisasyon ang ERPAT (Empowerment and Reaffirmation of Paternal Abilities) ug Solo Parent Federations human sa pagpahigayon og reorganisasyon ug election sa bag-ong mga opisyal niadtong Agosto 27, 2026, sa Amphitheater, Government Center.
Gipangunahan sa City Government of Dapitan, pinaagi sa City Social Welfare and Development Office (CSWDO), ang maong kalihokan isip kabahin sa pagpalig-on sa partisipasyon ug liderato sa mga sektor nga adunay dakong papel sa pag-atiman ug pagpalambo sa pamilya.
Gawas sa pagpili sa bag-ong mga opisyal, gihisgutan usab sa mga partisipante ang mga prayoridad sa ilang organisasyon, mga update sa operasyon, ug mga paagi aron mas mapaayo ang koordinasyon tali sa mga lider sa sektor ug sa lokal nga pangagamhanan.
Gipangunahan ni CSWDO Head Marilyn S. Sy ang strategic planning alang sa umaabot nga Family Week Celebration, diin gipunting ang mga kalihokan nga magpasiugda sa importansya sa lig-on, responsable, ug matinabangong pamilya.
Gihatagan usab og update sa mga kalihokan sa ERPAT si ERPAT Focal Person Vince Hamoy, uban ang pag-awhag sa mga lider ug miyembro nga mahimong mas aktibo sa ilang tagsa-tagsa ka komunidad.
Ang bag-ong liderato gilauman nga mahimong mas lig-on nga tingog sa mga ERPAT ug solo parents sa Dapitan. Pinaagi sa aktibong partisipasyon ug koordinasyon, mas dali nga madala ngadto sa lokal nga pangagamhanan ang mga panginahanglan, suhestiyon, ug mga isyu nga giatubang sa mga pamilya.
Padayon usab nga gisuportahan sa City Government of Dapitan ang pagpalig-on sa mga organisasyon sa komunidad aron masiguro nga ang matag sektor adunay tingog ug oportunidad nga makaapil sa pagplano ug pagpatuman sa mga programa alang sa kaayohan sa mga pamilya ug sa tibuok komunidad.(IKEN B. GULLEM)
Source: Dapitan City Government