Gilauman nga madagsa sa katawhan ang libreng medical check-up nga ipahigayon sa Zamboanga del Norte Medical Center (ZNMC) – Outpatient Department karong Disyembre 18, 2025, alas-8 sa buntag, alang sa tanang residente sa probinsya nga nanginahanglan medikal nga konsultasyon.
Gitanyag sa maong medical mission ang adult surgery cases sama sa breast mass, thyroid mass, rectal concerns ug uban pang operasyon gawas sa neuro, OB, EENT ug uro, aduna usab pediatric surgery cases, cancer cases, serbisyo alang sa dialysis patients sama sa AVF, fistula ug graft, samtang aduna usab konsultasyon para sa lung ug cardiac surgery cases.
Mokuyog sa serbisyo ang mga espesyalistang doktor nga naglangkob nila Dr. Jonathan Navarro, Dr. Imeldo Gamallo, Dr. Michael Burdador, Dr. Paul Serios, ug Dr. Noel Astrologo, nga andam motabang ug mohatag ug libre nga medikal nga tambag sa mga pasyente.
Gipahimutang ang klinika sa ZNMC Outpatient Department, samtang adunay dugang kasayuran nga makuha sa ZNMC Medical Team Office o OSAC Office sa 2nd Floor Capitol.
Ang kalihukan usa ka bahin sa paghatag ug malungtarong serbisyo-medikal sa katawan, ilabi na karong padulong sa Christmas season, diin gipasiugda ang pag-atiman sa panglawas isip usa ka porma sa pagkamahinabangon ug pagtagad sa komunidad.(IKEN B. GULLEM)
Source: Zamboanga del Norte Medical Team